Математикийн тэнхим

1951-1952 оны хичээлийн жилээс эхлэн Багш нарын оройн институт ба Багшийн сургуулийн дэргэдэх 5-7 дугаар ангийн багш бэлтгэх факультетыг хааж, тэдгээрийн оронд 5-7 дугаар ангийн багш бэлтгэх 3 жилийн хугацаатай Багшийн институт байгуулан, Засгийн газрын байрлаж байсан байшинд ажиллуулахаар тогтоожээ.

Багшийн институтийн анхны хичээлийн жилд, түүний анхдагч 4 салбарын нэг Тоо-физикийн салбарт 40 гаруй оюутан, 3 багш ажилласан байдаг. Тоо-физикийн салбарт 1952-1953 оны хичээлийн жил 1952 онд Улсын их сургуулийг төгссөн Г.Бямбаа нь багшаар ирж тус салбар жил дараалан шинэ багшлах боловсон хүчнээр бэхжиж иржээ. 1960-1961 оны хичээлийн жилийн эхнээс Тоо-физикийн тэнхимийг Физикийн тэнхим, Математикийн тэнхим гэж хоёр хуваасан байна.

1991-1993 онд ФМФ-ийн декан Г.Батбямба, 1993 оны Ректорын 161 дүгээр тушаалаар ФМФ-аас Ерөнхий физик, онолын физикийн тэнхимүүдийг авч Байгалийн ухааны сургалт эрдэм шинжилгээний төв байгуулснаар Математикийн салбар биеэ дааж Математик, компьютерын сургалтын салбар хэмээн нэрлэгдэх болж салбарын эрхлэгч Ж.Баатар болжээ.

1994 оны 8-р сард Математик, компьютерын сургалтын салбарыг Математикийн факультет болгожээ. 2001 оны сүүлээс Математик статистикийн сургууль болон зохион байгуулснаар захирлаар 2000-2004, 2009-2014 онд Ц.Батхүү, 2004-2006 С.Тогмид, 2006-2009 онд Б.Сандагдорж нар томилогдон ажилласан байна.

Манай тэнхимээс дэд профессор Б.Хоролдагва 2006 онд П.Хансены дэвшүүлсэн нэгэн сонирхолтой таамаглал болон түүний өргөтгөл, графын топологи индексүүдийн талаарх судалгааны ажлуудаа Томсон-Ройтерсийн индекстэй (IF-JCR) 8 сэтгүүлд хэвлүүлээд байна. “Discrete Applied Mathematics” сэтгүүлд хэвлүүлсэн ажилдаа шинэ хувиргалтууд оруулж ирснээр Хансены таамаглал нь графын тодорхой зарим ангиудын хувьд үнэн бөгөөд тэдгээрээс бусад ангиудын хувьд биелдэггүй болохыг харуулсан. Энэ ажлын үр дүн нь шинжлэх ухааны ололт амжилтын талаар мэдээлэлдэг “Vertical news” сэтгүүлд “Study results from B.Horoldagva et al provide new insights into mathematics” гарчгийн дор нийтлэгдсэн. Тэрбээр 2014 оны 8 сард БНСУ-д зохион байгуулагдсан дэлхийн математикчдын их хуралд “Direct comparison of the variable Zagreb indices of cyclic graphs” сэдвээр илтгэл хэлэлцүүлсэн. Улмаар 2014 онд шилдэг эрдэм шинжилгээний өгүүлэл шалгаруулах МУБИС-ийн захирлын нэрэмжит шагналыг хүртсэн байна.

2012 оноос хойш тэнхимийн багш нар 20 гаруй ном, сурах бичиг хэвлүүлж нийтийн хүртээл болгожээ.