Багшийн институт 1951 онд байгуулагдахад анхны дөрвөн салбарын нэг Байгаль-дэлхийн салбарт биологийн багш нарыг бэлтгэж эхэлсэн түүхтэй. Улмаар 1957 оноос дээд мэргэжилтэй багш нарыг бэлтгэх УБДС болж зохион байгуулагдахад Хими–Байгалийн тэнхим нэртэй байснаа 1960 оноос дангаар Биологийн тэнхим болжээ. Тус тэнхим нь төрөлх сургуультайгаа нас чацуу тус сургуулийн анхны тэнхимийн нэг юм. 1970-д оны эхээр хөдөө орон нутагт багш нар дутагдах болсон тул биологийн багш нарын түргэвчилсэн курсээр 400–аад багш нарыг бэлтгэсэн бөгөөд тэднийг 1977 оноос эхлэн байгуулсан биологийн багшийн эчнээ ангид суралцуулан төгсгөжээ. Биологийн тэнхим 1993 хүртэл Хими-Биологийн мэргэжлээр багш бэлтгэх ажлыг химийн тэнхимтэй хамтран гүйцэтгэж байгаад 1990 оноос дан биологийн мэргэжлээр багш нарыг бэлтгэх болсон бөгөөд түүний зэрэгцээгээр 1986-1991 онд Биологи-газарзүйн багш, 1995 оноос Экологи-химийн багш, 2005 оноос Биологи-газарзүйн багшийн ангийг дахин нээж, мөн Биологи-эрүүл мэндийн, 2007 оноос Биологи-Биеийн тамир-эрүүл мэндийн багш нарыг бэлтгэж ирсэн байна. Өнгөрсөн хугацаанд хими-биологи, биологи-байгалийн шинжлэл, экологи-хими, биологи-газарзүй, биологи-биеийн тамир-эрүүл мэнд, биологи-эрүүл мэндийн багш мэргэжлээр бүгд 3000 гаруй багш нарыг тус тэнхим бэлтгэн гаргажээ. Одоо Биологийн багш, Экологич, Эрүүл мэндийн багш, Хими-Биологийн багш, Биологи-Газарзүйн багш мэргэжилтэн бэлтгэж бакалавр, магистр, докторын сургалтыг явуулдаг. Сургалт сургуулийн орчинд анги танхим, лабораторид болон хээрийн нөхцөлд явагдаж байна.
Биологийн тэнхимийн эрхлэгчдээр дэд эрдэмтэн, доцент Лувсангийн Пүрэв (1960-1963), дэд эрдэмтэн, доцент Агваансамбуугийн Гочоо (1963-1965), ШУ-ы доктор, профессор Гомбын Данзан (1965-1990), профессор, дэд эрдэмтэн Хорлоогийн Мөнхбаяр (1990-2004), дэд эрдэмтэн, дэд профессор Хишигнямхүүгийн Төмөрбаатар (2004-2011), доктор, профессор Цагааны Хонгорзул (2011-2014 Ургамал судлал-Ерөнхий биологийн тэнхим), доктор, профессор Мөнхбаярын Мөнхбаатар (2011-2014 Амьтан судлал-экологийн тэнхим, 2014-2016 Биологийн тэнхим), доктор, дэд проф. Жаргалсайханы Ариунболд (2016 оноос одоог хүртэл) нар ажиллаж байна.
Тэнхим профессор-1, дэд профессор-4, ахлах багш-2, багш-5, туслах ажилтан-2 нийт 14 хүний бүрэлдэхүүнтэй эрдэм шинжилгээ, сургалт, арга зүй-зохион байгуулалтын үйл ажиллагааг явуулж байна. Биологийн тэнхимийн 12 багшийн 8 нь докторын зэрэгтэй.
Биологийн тэнхимийн төгсөгчид дундаас олон алдартай эрдэмтэн багш, судлаачид төрөн гарсан. Тус салбарыг төгсөгчдийн дотроос Монгол Улсын ардын ба гавьяат багш Х.Мөнхбаяр, Х.Бадамсэд, Шинжлэх ухааны гавьяат ажилтан, доктор, профессор С.Шатар, Монгол Улсын төрийн шагналт, академич, доктор, профессор Д.Батсүрэн, гавьяат багш С.Шийтэр, Ц.Гүррагчаа, Д.Дашдолгор, байгаль орчны гавьяат ажилтан О.Доржраа, доктор, дэд профессор С.Дуламцэрэн, ШУА-ийн бага чуулганы гишүүн, доктор, профессор Ш.Болдбаатар, Х.Тэрбиш, шинжлэх ухааны доктор, проф. Б.Сангидорж нарын зэрэг олон алдартнууд төрөн гарсан нь бидний бахархал юм.
Биологийн тэнхим нь эрдэм шинжилгээ, сургалт, арга зүй-зохион байгуулалтын үйл ажиллагааг доктор (Ph), профессор Ц. Хонгорзул, доктор (Ph), дэд проф. Ж. Ариунболд, Э. Мөнгөнтулга, доктор (Ph), Я. Оюунчулуун, В. Гүндэгмаа, ахлах багш, доктор (Ph) Г. Онолрагчаа, Ч. Сувдцэцэг, доктор (Ph), багш И. Даваажаргал, магистр багш Т. Баянмөнх, П. Эрдэнэтүшиг, Т. Мөнхзул, Д. Сайндовдон, хичээлийн туслах ажилтан Г. Түвшинжаргал, М. Мижиддорж нарын 14 хүний бүрэлдэхүүнтэйгээр явуулдаг. Үүн дээр шинжлэх ухааны доктор (Sc), проф. Ш. Дариймааа, доктор (Ph), проф., ардын багш Х. Мөнхбаяр, доктор (Ph), проф. Г. Саранцэцэг нар зөвлөхөөр ажилладаг. Нийт үндсэн багш нарын 67 хувь нь докторын зэрэгтэйгээс доктор (Ph)-8, магистр-4 байна.
Тэнхимийн дэргэд улсын итгэмжлэгдсэн “Палинологийн лаборатори” үйл ажиллагаа явуулдаг. Оюутны “Визгүй аялагчид”, “Эдельвайс”, “Оюунлаг залуус”, “Хүмүүнлэг залуус”, “Залуу удирдагч эмэгтэй” клубүүд ажилладаг.
СУРГАЛТЫН ҮНДСЭН ЧИГЛЭЛ
- Биологийн багш, Байгалийн Ухааны боловсролын бакалаврын сургалтын хөтөлбөр
- Эрүүл мэндийн багш боловсролын бакалаврын сургалтын хөтөлбөр
- Экологич бакалаврын сургалтын хөтөлбөр
- Биологийн магистрын хөтөлбөр
- Биологи боловсролын магистрын хөтөлбөр
- Биологийн докторын хөтөлбөрүүдээр
“Биологийн багш”, “Биологи-Газарзүйн багш”, “Хими-Биологийн багш”, “Биологи-Эрүүл мэндийн багш”, “Экологич” мэргэжлийн бакалавр, “Биологийн ухаан”-ы болон “Биологи боловсрол”-ын магистр, “Биологийн доктор”-ыг бэлтгэн гаргадаг.